Ingichka poshnali poyabzallar qanchalik jozibador bo’lmasin, biz – ayollarga qanchalik yoqmasin, ularni muntazam ravishda kiyish salomatligimizga putur yetkazadi. Ushbu mavzuni ko’tarishimizdan maqsad ham shu: baland poshnaning ayol sog’lig’iga ko’rsatadigan ta’sirlaridan ogoh etish. Baland poshnali oyoq kiyimlarni muntazam kiyish faqatgina oyoq tomirlarida emas, balki butun organizmda jiddiy o’zgarishlar sodir bo’lishiga olib keladi: Poshnasi 3 santimetrdan baland bo’lgan poyabzallar doimiy ravishda kiyilganda: • Oyoq bo’g’imlari shikastlanadi; • Tos-son sohasida moddalar almashinuvi sekinlashadi; • Boldir venalarining varikoz kengayishi boshlanadi. • Bora-bora osteartroz va osteoporoz (suyakning g’ovaklanishi) vujudga keladi. Poshnasi o’ta baland (masalan, 5-10 santimetr) oyoq kiyimlar mushaklarni zo’riqtiradi, oyoqni tez charchatadi; Barmoq qismi o’ta tor, umuman, tor poyabzallarda oyoqlar uzoq vaqt qisiladi, oqibatda, dastlab oyoq barmoqlari, so’ng oyoqning butun skeleti ziyon ko’radi: • Oyoq barmoqlari shilinadi, shuningdek, qiyshaya boshlaydi; • Oyoq bo’g’imlari yallig’lanadi; • Tor poyabzalda qon tomirlari ham ma’lum muddat qisiladi. Bu esa oyoqlarda qon aylanishini buzadi, tovon mushaklarining qon bilan ta’minlanishini izdan chiqaradi; • Yassioyoqlik kelib chiqishi ham ehtimoldan holi emas; Ayniqsa, balog’at yoshidagi qizlar uchun baland poshnali oyoq kiyimlar o’ta zararli: • O’smirlarning mo’rtroq suyaklariga zarar yetkazadi; • Tos suyagining qiyshayishiga olib keladi. Yuqoridagi ikki holat tug’ruq paytida jiddiy muammolarga sabab bo’lishi mumkin. Tavsiyalar: Odatiy kunlarda poshnasi 3 santimetrdan ziyod bo’lgan poyabzallarni kiymaganingiz ma’qul; Mashqlar – bo’g’imlarning qayishqoqligini orttiradi. Shuning uchun turli marosim-u tantanalarda baland poshnali oyoq kiyimlarni kiyishdan oldin va chiqargandan so’ng, oyoq uchi bo’g’imlari bilan turli mashqlar qiling; Imkon qadar toza charmdan tikilgan oyoq kiyimlar kiying. Sun’iy teridan tikilgan poyabzal oyoqlarni dimiqtirib, tirnoq va teri kasalliklarini yuzaga keltiradi.