O'zbek oilasi borki, qaynona va kelin munosabatlari mavjud. Ba'zi oilalarda bu munosabatlar a'lo darajada bo'lsa, ba'zi oilalar ushbu munosabatlar tufayli buzilib ham ketmoqda. Qaynonaga kelin o'zi qanday munosabatda bo'lishi lozim? Kelin erining ota-onasi bilan birga yoki alohida turishidan qat'iy nazar, uning qaynona oldida qator majburiyatlari mavjud. Masalan, Qaynonani kelin hurmat qilishi shart; Qaynonaga shirin so'z bo'lish muhim! Qaynonani xizmatini qilish kerak; Qaynonaga choy tayyorlash lozim; Qaynonaga gap qaytarmaslik kerak; Qaynonaga qo'pollik ko'rsatmaslik muhim va hokazolar. Bundan tashqari barcha oilalarning o'ziga xos talab va ehtiyojlari bo'lishi mumkin. Ularga amal qilish kelinning burchidir. Lekin bir narsani kelin bajarishi shart emas. U ham bo'lsa qaynonaga yoqish! Kelin qaynonaga yoqishi kerak emas, muhim ham emas, shart ham emas! Mana shu oddiy iborani tushunib yetgan kelin, qaynonasidan hafa bo'lishni to'xtatadi, qaynonasi qovog'i uyushganida o'ziga olmaydi, qaynonasi minnatdor bo'lmaganida asabiylashmaydi. Kelin avallambor eriga yoqishi kerak. Ertayu- kech, tunu-kun u eriga yoqimli bo'lishi haqida o'ylashi kerak. Gapi bilan, ko'rinishi bilan, qiliqlariyu, ovqati bilan, tili va dili bilan eriga yoqishi lozim. Bu ayolning eng birlamchi vazifasidir. Qaynona erining onasi bo'lgani uchun unga yaxshi munosabatda bo'lishi lozim, lekin uning mehr-muhabbatini qozonishi shart emas. Buni harakatini qilish ham talab etilmaydi. Qaynona kelinini yoqtirib qolsa, juda yaxshi. Kelin yoqmayotgan bo'lsa, ming afsus, muhimi eriga yoqmoqda. Shu o'rinda muhim jihat shundaki, qaynonaga yoqmaslik - bu uni hurmat qilmaslik degani emas. Shu nozik farqni his eta olish kerak. Ya'ni kelin o'z kelinlik vazifalarini qo'lidan kelganicha bajaradi, lekin natijada qaynonasi uni yoqtirib qolishini umid qilmasligi zarur. Mana shunda gina, alam, janjal va qovoq uyishlarga joy qolmaydi. Kelin kelinlik vazifasini bajaradi, qaynona qaynonalik vazifani. Muhabbat, yoqtirish, ranjish kabi tuyg'ular esa bu munosabatlarga aralashmaydi. Bir tomonda kelin:"Oyijonimga nima qilsam ham yoqmayman," deb yig'lashlariga yakun yasaladi. Chunki u ish qilayotgan bo'lsa, qaynonasiga yoqish uchun emas, kelinlik vazifasini bajarish uchun qilayotganini anglay oladi. Ikkinchi tomondan qaynona o'g'liga: "Xotiningni hech bir ishi-yu, qilig'i yoqmaydi", deganida, eri bemalol: "Oyijon, xizmatingizni qilyaptiku, yoqmaydigan xizmatidan shikoyat qiling, o'zidan emas","deb ayta oladi. Afsus, ba'zi kelinlar qaynonasiga yoqish niyatida, butun yoshlik davrini shunga ketqazadi. Natijada esa, yoshligi o'tib ketgan bo'ladi, orada eri va bolalariga na kuchi na mehri qolgan bo'ladi. Ertalab soat 5 ta turib, kuni bilan qaynonasiga yoqish niyatida tinmay ish qilib, kechasi soat 12 dan so'ng erini oldiga kirganida, afsus eriga yoqish ham kerakligi haqida ayol unutib qo'yadi yoki kuchi qolmaydi. Kelin xizmatkor emas, u ham shu xonadon bekalaridan biridir. Qaynona kelinni yoqtirmayotgan bo'lsa, bu qaynonaning muammosi, kelinniki emas. Kelin kelinlik xizmatini qo'lidan kelganicha, imkoniyatidan kelib chiqqan holda bajarishi kerak, xolos. Qaynonaga yoqish darajasida emas. Ayol qaynonasiga emas, eriga yoqimli bo'lish uchun qancha harakat qilmasin, arziydi! Bu uning oilasini saqlanishiga ham yordam beradi. Qaynonaga yoqish niyatida yurgan ayol esa, er -xotin munosabatlarini boyitishga kuchi qolmaydi .